October 25, 2014

Bojkoti i Europianit, do demaskojë më keq UEFA-n!




Nga Arben Manaj

Prostituimi diplomatiko-sportiv i UEFA-s, për ndeshjen Shqipëri-Serbi, aq sa është skandaloz aq ishte edhe i pritshëm.
Nuk kisha dyshim që e kam shprehur publikisht edhe ditë më parë, se pas deklaratës së Platinisë, UEFA do të merrte një vendim “as mish, as peshk”, ku do të njësonte në faj si mëkatarin, ashtu edhe viktimën.
Shqipëria do të apelojë dhe nisë një betejë juridike. Por kjo nuk është fatkeqësisht e mjaftueshme. Ka ardhur koha që Shqipëria të marrë një vendim të dhimbshëm dhe largpamës.
Bojkotimi i kompeticionit në mënyrë demonstrative nga Shqipëria, mbetet fatkeqësisht i vetmi opsion real dhe efektiv që bota e qytetëruar të mësojë përmes vetësakrifikimit unikal shqiptar se, çfarë ndodhi në atë ndeshje barbarie dhe çfarë lloj drejtësie jep institucioni evropian i futbollit.
Ky veprim in-extremis, pasi nuk kam besim se apeli do ndryshojë diçka për mirë, përpos ndonjë retushimi sa për sy e faqe, do të mund të shndërrohet në gjestin më produktiv të PR-it shqiptar, pasi është një shans i artë që Evropa dhe bota të mësojë përmes medieve shkakun e largimit dhe bojkotit shqiptar të eliminatoreve të Evropianit në vendin e Platinisë.
Media ndërkombëtare, me siguri absoulte matematikore, do t’i rikthehet këtij lajmi dhe do të kërkojë të eksplorojë arsyet dhe shkaqet e Shqipërisë për një veprim të tillë.
E ky gjest do duhet ndryshe nga hera e parë që të shoqërohet me një përgatitje më të mirë argumentuese mediatike nga Tirana.
Kjo vendosmëri dhe ky vizion nga Shqipëria dhe institucionet shqiptare, edhe pse do të mund të humbasin në plan afatshkurtër, do t’i bëjnë një shërbim të madh drejtësisë sportive dhe do të demaskojnë mentalitetin e kalbur dhe racist, do thosha të vendim marrjeve nga një institucion, që në mënyrë absurde ka si banderolë “No to Racism”!!
Bojkoti shqiptar do t’i shërbejë edhe emancipimit  dhe shkundjes së një institucioni të dashur për evropianët dhe sportin e futbollit, i cili me këtë ndeshje dhe mënyrën sesi u luajt, tregoj se vetëm sport nuk ishte, por një ndeshje e denjë për Coloseum-in e Romës në antikitet.
Bojkoti është edhe mbi të gjitha dhe para se gjithash, çështje dinjiteti shtetëror dhe Shqipëria e vogël, do të duhet të vlerësojë më shumë këtë dinjitet kombëtar që të mos nëpërkëmbet, sesa gjobat financiare që mund të marrë.
Në fund të fundit , edhe sikur sondazhi të bëhej me shqiptarët sportdashës, do e kishte mbështetjen e tyre.
UEFA me këtë vendim nuk bëri gjë tjetër, veç se sanksionoi dhunën në sport, pasi mesazhi është se çdo ekip mund të rrihet si “gomari në duhan” në fushë dhe brenda stadiumit, e sërish t’i kërkohet të luajë edhe pse me gjymtime fizike dhe psikologjike. Këtë nuk do ja pranonte asnjë Federatë apo vend i madh evropian aq me tepër Britania p.sh.
Madje kryeministri Cameron, do kohë me pare i shkroi personalisht Platinisë për ndeshjen e të rinjve mes Anglisë dhe Serbisë për disa abuzime verbale raciste dhe imagjinoni se çdo kishte ndodhur, me siguri revolucion, nëse kombëtarja angleze do të keqtrajtohej në këtë mënyrë si ajo shqiptare në Beograd, France a Spanjë.  E përse do të duhet të trajtohet Shqipëria ndryshe?!
Do të kishte qenë më e ndershme sikur Serbisë, me këtë logjike të korruptuar, të mos i hiqeshin pikët, e po sipas kësaj logjike malinje , Shqipëria t’i shtronte në dru në të njëjtën mënyrë siç ndodhi në Beograd serbët dhe ta fitonte ndeshjen në tavolinë.
Jo, kjo veë se drejtësi dhe mesazh sportiv nuk është. UEFA është në pikë të hallit dhe ka nevojë që të shpëtohet nga vetë sakrifikimi shqiptar, pasi do të gjenerojë një debat mjaft të madh sportiv, pasi nuk ka evropian me logjikë të ftohtë të tolerojë sjellje të tilla antisportive në një sport për të cilin ata shpenzojnë miliarda për t’u argëtuar e jo që futbolli të shndërrohet nga lojë me top, në lojë me dema dhe toreadorë.
Shqipëria dështoi fillimisht në pranimin me inferioritet të shkuarjes në Beograd pa tifozët e vetë, duke toleruar Serbinë, kur do të duhej që refuzimi shqiptar ta detyronte UEFA-n ta zhvillonte ndeshjen (nëse serbët nuk garantonin dot sigurinë, siç nuk e garantuan), kudo në Zagreb, Romë a Londër.
FSHF-ja dështoi edhe me këtë vendim të UEFA-s, aq më tepër kur kryetari i saj kërkonte publikisht jo tri pikët, që faktikisht UEFA ia mohoi në tavolinë, por çuditërisht paqen me Serbinë, a thua se Duka është Rama e UEFA është OKB-ja!
Ky dështim i FSHF-së, në bindjen e drejtësisë së rastit shqiptar, do duhet të shoqërohet me një tjetër gjest emancipues, dhe pikërisht atë të dorëheqjes së Dukës, i cili ka në këtë post, që nga koha kur kanë lindur shumica e tifozerisë së re kuqezi.
Më një gjest të tillë do të mund të bënte që edhe Platinia, në një rast fatlum, të mund ta pasonte atë, në mënyrë që UEFA, si qeveria evropiane e futbollit, të mos jetë më  epidemi e korrupsionit dhe kronikës sportive, siç shpesh sulmohet.
Bojkoti i Shqipërisë në kompeticionin evropian, do të nxjerrë në pah të vërtetën  e madhe të asaj që lojtarët shqiptarë iu nënshtruan në Beograd, por edhe do të ketë mirëkuptimin e logjikës së shëndoshë sportive evropiane, pasi me të, do  tregojë se meriton të trajtohet me dinjitet si një vend kandidat në BE, duke mbrojtur një kauzë për të cilën çdo evropian normal, do të bënte gjithçka, që loja e bukur dhe e lashtë të mos cenohej nga dhuna dhe justifikohej nga njerëz që mendojnë se standardi i dyfishtë do mund të tolerojë racizmin nacional.

(Shqip)



*   *   *




Hakerët lëshojnë dronin me Flamurin e Shqipërisë së Madhe në uebfaqen e Qeverisë serbe




Pas vendimit të UEFA-s, hakerat shqiptarë kanë lëshuar dronin me figurat kombëtare dhe hartën e Shqipërisë së Madhe, i cili para disa ditësh zbarkoi në stadiumin e Beogradit.

Për disa minuta, hakerat shqiptarë kanë mundur që të sulmojnë edhe uebfaqen e Qeverisë serbe, ndërsa fotoja ka bërë tashmë edhe xhiron në rrjetet sociale.

Autoritet serbe kanë mundur që ta rikthejnë në punë faqen e tyre.


*   *   *






October 24, 2014

The Guardian: UEFA inkurajoi sjelljet prej Arkani në Serbi. Shqipëria, shanse për kualifikim





Gazeta britanike “The Guardian” e nis shkrimin e saj për vendimin e UEFA-s mbi ndeshjen Serbi-Shqipëri me një shprehje të Michel Platini kur mori detyrën vitin e parë.

Politikanët duhet të merren me politikën, por sporti duhet të jetë një vend i vëllazërisë që bashkon njerëzit“.

Por në shkrimin e Owen Gibson, vihet në pikëpyetje kjo deklaratë e Platini.

Duke analizuar vendimin përshkruhet lufta mes Kosovës dhe Serbisë dhe ajo që ndodhi në stadiumin e Partizanit më 14 tetor. Tregohet për lëndimin e futbollistëve shqiptarë dhe mos gatishmëria nga ana e Serbisë për të mbajtur rendin në stadium.

U  kënduan këngë si “Vrisni shqiptarët” dhe “digjni ata të gjallë derisa asnjë prej tyre të mos mbetet i gjallë’. Paraqitja e njohur e huliganit Ivan Bogdanov në turmë shihet si simbol i mungesës së dëshirës ose paaftësisë së autoriteteve serbe dhe policisë për sigurimin e lojës dhe kujton lidhjet e ngushta në mes Beogradit dhe Arkanit në rajon në fund të viteve ’90”, shkruan The Guardian.
Serbia do të përballet thjesht me humbjen e të ardhurave nga të dy ndeshjet në shtëpi me dyer të mbyllura. Shqipëria mori dënimin të rëndë sportiv“.

Gazeta britanike shtron pyetjen se si do të veprojë UEFA me ndeshjen e kthimit në Shqipëri vitin e ardhshëm, ndërsa thekson se Shqipëria ka shanse të mira për kualifikim.


*   *   *


Alban Meha: Flamurin kuqezi do ta ngremë në Francë




Mesfushori i Kombëtares shqiptare, Alban Meha kërkon të mbajë lart moralin e ekipit pas vendimit të UEFA-s. "Padrejtësia na bën më të fortë, do të kualifikohemi me forcat tona dhe do të shkojmë ta ngremë flamurin kuqezi në mes të Francës. Vetëm kundër të gjithëve. Sa më shumë të na dënosh, aq më shumë do të na bashkosh. Shqipëri etnike", shkruan Meha.


*   *   *





O Sa mir me qenë Shqiponjë o Hej!





Grekët: 
Dëboni Kasamin që festoi me shqiponjë

Lojtari i Olimpiakos me origjinë shqiptare Pajtim Kasami është vënë në qendër të kritikave të mediave greke. Kjo, për shkak të festimit të golit ndaj Juventus të martën duke krijuar me duar simbolin e shqiponjës. 

Gazeta “I prasini” ka shkruar në faqe të parë “Dëbojeni tani”. Sipas kësaj gazete festimi i golit në këtë mënyrë nga Pajtim Kasami është një provokim i rëndë. Gazeta arrin deri aty sa ta konsiderojë gjestin e Kasamit një shenjë të “Shqipërisë së Madhe”. Në stadium e Pireut  ka pasur edhe disa flamuj serbë dhe një shqiptar. Sipas mediave gjesti i Kasamit është një qëndrim politik edhe për atë që ndodhi në Beograd.

Punë evgjitësh:

Historikisht rivalët Panathinaikos – Olimpiakos, zihen e grihen me njeri-tjetrin dhe duan ta nxjerrin inatin te Kasami.


O Sa mir me qenë Shqiponjë o Hej!



*   *   *