PërPara!

Varka PD dhe varkari Luli

PërPara!

*   *   *

Shënime nga Ditari i Doktorit: 

Problemet e Lulit me partinë

Antena - 2 Shtator, 2013

Sot mesazhi i Lulit ishte shumë prekës. E para, ishte shqetësuar që gazetat kishin shkruar se unë nuk do kem zyrë në PD, por tek kulla e Bashkimit. Më kish shkruar një sqarim të gjatë se këto janë shpifje që i përhapin njerëzit e Edi Ramës se duan të krijojnë idenë sikur unë dua të distancohem nga ty. Vazhdonte me disa fjali të gjata dhe vazhdonte të sqaronte se këto janë shpifje. I ktheva një përgjigje të qetësohej. Pastaj e mora në telefon.

-Ishte shumë i ndyrë ai lajmi, më tha. Të betohem që nuk ka rrjedhur nga ne. E gjithë ajo ndërtesë është e jotja, jo vetëm një zyrë.

-Nuk e vë në dyshim, i thashë. Bile nuk jam shqetësuar fare. Kam dhënë porosi që çdo gjë të bëhet sipas rregullave, bile të bëjnë dhe një zyrë për ty. S’ka pse të kemi një zyrë bashkë.

U qetësua në fakt. Pastaj e pyeta çfarë ka ndonjë gjë tjetër.

-S’ka ndonjë gjë, tha. Ky është lajmi më i rëndë që kam lexuar sot. Kjo është shpifje e Edi Ramës. Si mund ta nxjerr unë atë nga goja?

-E mbyllëm këtë bisedë, i thashë, ça ka ndonjë gjë tjetër?

-Po s’ka ndonjë gjë me rëndësi, më tha. Dje ka pasur zgjedhje në komuna, por nuk jam marrë fare me to se më iku truri nga ky lajmi, nuk e duroja dot. Është një diversion i Edi Ramës.

-E besoj plotësisht, i thashë. Po pyet një herë si kanë dalë zgjedhjet.

-Po ç’rëndësi kanë zgjedhjet Doktor. Lajmin më të zi Edi Rama ua dha demokratëve në mëngjes që në selinë e PD-së nuk do ketë zyrë për ty. Asnjë lajm nuk mund të jetë më i zi se ky.

-Ore, atij ja rregulloj unë, i thashë, se ulem bëj unë lajm për të tani e bëj leckë. Se ç’ka ndodhur që the ti? Kanë dashtë me bë mbledhje në Durrës. I kanë thënë Gjushit na gjej hotel. Gjushi i ka thënë nuk u gjej hotel se nuk më ke pyetur për qeverinë. Atëherë Piktori është nxehur dhe i ka thënë nuk iki dot në Shkodër se ka zgjedhje dhe dihet që i humbasim se nuk pyes për hotelin tënd. Dhe ka plasë sherri.

Luli sikur u qetësua dhe u kënaq nga projekti im për deklaratën.

-Tani mos u mërzit, i thashë, po pyet një herë si kanë dalë zgjedhjet se po e kemi fitu Shkodrën, kam me e zbu nga Shkodra.

Më mori pas pesë minutash përsëri.

-Doktor, tha, nuk kam kë të pyes në Shkodër, s’kam asnjë numër telefoni.

-Po pyet Jozefinën, i thashë.

-Nuk ia kam as asaj numrin, tha, por dhe më vjen zor t’i bëj telefon.

-Mirë, i thashë, se ta dërgoj numrin e kryetarit të partisë. Ia dërgova.

Më mori prapë në telefon.

-Doktor, nuk ma hap telefonin, tha. I dërgova sms, i thashë jam Lulëzim Basha dhe më ktheu përgjigj: ‘Lulëzimi nans tane!’. Nuk beson që jam unë.

Atëherë i nisa unë një sms kryetarit të Shkodrës duke i thënë ‘nëse vjen sms nga ky nr. telefoni, është Lulëzimi’.

Më mori në telefon dhe më tha se i paska ardhë një sms e tillë, po ai s’e ka besuar. Më kërkoi falje dhe më premtoi se do lidhej me të.

Pas pak më mori prapë Luli. M’u duk i gëzuar.

-Kam një lajm të mirë, tha, dhe një lajm të keq.

-Ma thuj të keqin në fillim, i thashë.

-Në Shkodër kena humb 75 me 25 përqind, tha. S’e kena ditë që këta shkodranët qenkan socialistë të thekun.

-E lajmi i mirë kush është sipas teje, i thashë.

-Më ka ardhë sms nga kryetari i Shkodrës. Më thotë kam respekt për ty.

http://www.gazetatema.net/web/2013/09/02/shenime-nga-ditari-i-doktorit-problemet-e-lulit-me-partine/

Të shpartalluar!

Nga Mero Baze

Partia Demokratike ka humbur zgjedhjet e pjesshme në dy komuna, zhvilluar ditën e diel, me një rezultat të frikshëm që tejkalon shumë rezultatin e 23 qershorit. Në komunën Rrethinat në Shkodër, një zonë tradicionalisht bastion i PD, dhe në Dardhas në Korçë, rezultati ka qenë në kufijtë e 70 me 30 përqind.

Nuk do t’ia vlente të komentoje rezultatin e dy zgjedhjeve të pjesshme po të mos ishte kaq i thellë dhe kaq i ndryshëm nga 23 qershori.

Duke qenë se ky është rezultati i parë i zgjedhjeve më kryetar Lulëzim Bashën, arsyeja për të parë se ç’po ndodh me Partinë Demokratike bëhet dhe më e fortë.

Nëse ka një fjalë përmbledhëse  se ç’po ndodh me partinë më të madhe të opozitës në këto momente, mund të thuhet thjesht se është shpartalluar. Sali Berisha, i cili për të larguar vëmendjen nga humbja e tij e thellë, tentoi t’i bënte terapi partisë duke shpikur një garë fallco brenda saj dhe duke emëruar një kukull të tij në krye të saj, nuk ka bërë asgjë tjetër veçse ka demotivuar tërësisht partinë. Tallja e tij me zgjedhjet brenda partisë, dhunimi i rregullave të lojës, përfshirja e tij për të zhdukur të drejtën e votës së fshehtë dhe qëndrimet përjashtuese të mbajtura pas kritikave për zgjedhjet, kanë bërë që tashmë vetë anëtarët e Partisë Demokratike të mos besojnë së pari tek partia e tyre. Rezultati kaq i thellë në dy komuna, të cilat kanë qenë të PD-së dhe një prej tyre dikur dhe bastion i saj, tregon qartë se Lulëzim Basha ia ka arritur ta bëjë Partinë Demokratike inekzistente dhe ka dekurajuar çdo qelizë të saj. Rezultati ngjan qartazi që është një përpjekje për mbijetesë e vetë kandidatëve për të marrë afërsisht një të katërtën e votave të kundërshtarit dhe tregon praktikisht se Partia Demokratike është në gjendje kome.

Kjo gjendje është shpjegimi më i mirë përse përpjekja e një lideri për të mbajtur me çdo çmim nën kontroll pushtetin brenda partisë, nuk funksionon dhe është vdekjeprurëse për atë parti. Sali Berisha, në përpjekje për të shmangur ikjen e tij nga politika dhe çlirimin e Partisë Demokratike nga trashëgimia e tij, sajoi një farsë banale ndryshimi, duke i bindur të gjithë që jo vetëm që nuk iku, por dhe as ka ndërmend të ikë. Kështu, jo vetëm nuk e ka marrë seriozisht askush Lulëzim Bashën, por janë realisht të nervozuar përse ky plak i rrjedhur u ngatërrohet ende nëpër këmbë me deklarata të përditshme haluçinante dhe me përpjekjen për të diktuar debatin politik brenda PD-së me një nivel ordiner politik. Duke e mbajtur atë parti nën trysninë e dhunës së pushtetit të tij të brendshëm dhe strukturave gjysmë-paramilitare në oborret e PD-së, Berisha po ia del ta viktimizojë atë parti deri në përdhunim, duke e kthyer në një trup pa jetë dhe pa vlerë.

Zgjedhjet treguan se partia ka pushuar së funksionuari dhe me këtë ritëm ajo mund të dalë nga skena politike. Fakti që trashëgimia e Sali Berishës, dhe vetë ai, duan të diktojnë me çdo kusht të ardhmen e saj, dhe përpjekja për të shpallur armiq çdokënd që kërkon minimalisht zgjedhje të lira brenda partisë së tyre, ka prodhuar dukshëm disfatizëm dhe shpartallim të strukturave të partisë.

Lulëzim Basha, i cili më shumë harxhon kohë për ndonjë leje pallati me Kunatin dhe ndonjë allishverish me tokën tek PD-ja dhe SHQUP-i, tani ka rastin të shikojë se çdo të thotë të ndeshet me gënjeshtrën që beson vetë, me faktin që e kanë caktuar kryetar të opozitës. Perceptimi real i popullit opozitar për të është ai i rezultatit të zgjedhjeve të së dielës. Nuk e besojnë as të vetët!

Nuk pres të dalë të bëjë autokritikë për humbjen dhe as të tregojë përralla për manipulime, por pres të ulet e ta mendojë seriozisht se çfarë roli të shëmtuar ka marrë përsipër në tragjikomedinë e opozitës që e pret përpara, ku figurat më të rëndësishme po dalin Mediu dhe Nard Ndoka, dhe shpresa për të ardhmen mbetet ndonjë përçarje e së majtës. Ky njeri që e quan veten tashmë lider të opozitës, ka hyrë në këtë betejë pa asnjë aset, por vetëm me faktin që di t’i buzëqeshë Berishës dhe Familjes,  në atë mënyrë sa dhe ata të binden se ky është një kulish i rrahur që s’ka për t’i kafshuar kurrë!

http://www.gazetatema.net/web/2013/09/02/te-shpartalluar/