Kristaq Rama dhe Edi Rama

"Bisedë mes brezash"

Një foto e vitit 1980 me titull “Bisedë mes brezash” është bërë publike në Panairin e Librit 2013, në Tiranë. Fotoja është pjesë e një albumi fotografish të  fotoreporterit të talentuar, Petrit Kumi.

Në foto shfaqet kryeministri Edi Rama gjatë një shëtitjeje me të atin, Kristaq Rama, në Parkun e Liqenit Artificial.

Kumi ka fiksuar përmes fotove historinë e Shqipërisë në më shumë se 50 vjet.

*   *   *

Një protestë

… me kokën në rërë?

Ana e panjohur e protestës, një bisedë e sikletshme me një nga organizatorët

Intervistoi: Habjon Hasani

Një protestë… me kokën në rërë? Kastriot Frashëri bashkë me Sazan Gurin, Kozara Katin, Blendi Kajsiun, etj ishin grupi i organizatorëve të protestës. Kastriot Frashëri, pasditen e djeshme, erdhi në vëmendjen e gazetës, pasi në DITA-online, ai kishte lënë një koment si lexues internaut, duke shprehur hapur dakordësinë e tij mbi një editorial të kryeredaktorit të gazetës për çështjen e armëve kimike. Editoriali vinte në pah disa arsye pse këto lëndë mund të pranoheshin për trajtim, për pasojë dakordësia e një organizatori proteste me këto arsye, na bëri pak çudi. Ndaj dhe e kontaktuam. Vendosëm të flisnim me të.

Intervista nuk ka nevojë për shumë komente, njerëzit që kanë frymëzuar opinionin publik për lëndët kimike në emisione televizive, pranojnë pa asnjë ndrojë se nuk dinin ne thelb asgjë për këto lëndë dhe për procesin. Me pak fjalë ishin si të thuash “me kokën në rërë”, zero informacion te rendesishem mbi atë që ishin duke e kundërshtuar me aq forcë. Përmendin dhe fjalët “google”, apo “kafene” si burime të tyre të informacionit. Nuk kishin asnjë ide se kush do e kryente procesin e asgjësimit të këtyre lëndëve dhe as mbi teknologjinë që do të përdorej. E megjithatë jo vetëm dolën kundër, por frymëzuan dhe shumë të tjerë, duke konvertuar paditurinë në paranojë dhe frikë. Z.Frasheri pranon madje që nëse do kishin informacion nga qeveria, do reagonin ndryshe.

Ai shton edhe se ambientalistët shqiptarë do kërkojnë që në Shqipëri të asgjësohen mbetjet ekzistuese kimike në 30 pika të ndryshme të vendit. Kur e pyet se a ka frikë nga ky asgjësim, ai përgjigjet se nëse asgjësimin do e kryejnë specialistë, nuk ka arsye për të pasur frikë. Një logjikë që çuditërisht nuk vlejti për lëndët kimike për të cilat u protestua.

 *   *   *

Zoti Frashëri, ju keni bërë një koment online në faqen e gazetës DITA në shkrimin e kryeredaktorit mbi lëndët kimike. Na bëri përshtypje ky koment i juaji, ku binit dakord me një sërë arsyesh që mbështetnin shkatërrimin e lëndëve kimike në Shqipëri, ndërsa jeni një nga organizatorët e protestave kundër këtij shkatërrimi. Si shpjegohet ky dyzim?

Qëndrimi në editorialin e zotit Thano e konsideroj shumë të saktë. Nëse ne do kishim informacione nga qeveria se çfarë bëhej me procesin, apo çfarë armësh apo çfarë lëndësh ishin, do ishte me mirë ti dinim.

Kjo do të thotë që ju nuk kishit informacion?

Ne nga ajo që çfarë pamë nëpër televizione, në “google” etj u munduam të informoheshim. Por nuk kishim asnjë informacion

Në “google”? Çfarë zbuluat në google?

Ne në “google” pamë këto gjërat, çfarë është Zarina çfarë janë lëndët kimike si bëhet demontimi i tyre dhe filluam të shqetësoheshim.

Kur u bindët ju? Kur menduat se ishte e domosdoshme që të organizoheshit në një protestë, në një lëvizje?

Ne vendosëm kur mediat nisën t’i bënin jehonë kësaj çështje dhe ne u ndërgjegjësuam. Unë që në fillim jam deklaruar se Shqipëria është një vend i vogël, nuk ka kapacitetet e nevojshme, nuk ka infrastrukturë, nuk ka stafin dhe personelin teknik dhe arsye të tjera.

Dmth ju mendonit që ky proces do kryhej nga një staf shqiptar… Ju zoti Frashëri kishit informacion që ky proces do të kryhej nga një staf shqiptar?

Jo, ne nuk kishim asnjë informacion por duke parë procesin duke parë një ngjarje të shëmtuar siç ka qenë Gërdeci, siç janë dhe gjërat këtu në Shqipëri sepse shqiptarët nuk kanë qenë kurrë ndonjëherë të zotë për të bërë punë për së mbari, kështu që ai mund të degradonte.

Ju mendoni që një biznes si ai i rastit të Gërdecit që ju referoni, është i barabartë me një çështje si kjo e lëndëve kimike siriane ku janë të angazhuar Presidenti i SHBA-ve, i Rusisë dhe OKB-ja? Mendoni se mund të hiqen paralele?

Nuk them se mund të hiqen paralele…

E dinit apo jo për çfarë procesi bëhej fjalë?

Neve në informacionin fillestar që kishim nuk e dinim se si ishte. Pastaj kur u futëm në detaje, unë personalisht fillova të bëj kërkime.

Dhe ju doli që OKB-ja dhe një kompani private amerikane në Gërdec janë e njëjta gjë?

Po sigurisht nuk janë e njëjta gjë. Janë dy gjëra të ndryshme, unë nuk mund të them dot që janë e njëjta gjë.

Kur u bindët ju zoti Frashëri, që pikërisht ajo lëndë që do vinte në Shqipëri, do bënte gjëmën? Kur e formuat këtë bindje?

E thashë në arsyet e mësipërme, Shqipëria është një vend shumë i vogël, kudo që mund të ndodhen këto, duhet të ketë të paktën një rreze ose një diametër prej 30 kilometër. Nuk mendoj se në territorin shqiptar ka ndonjë zonë apo krahinë që të mos jetë e populluar. Ne kishim informacione që magazinimi mund të bëhej në Mjekës dhe demontimi në Qafë Thanë.

Nga kush i kishit këto informacione zoti Frashëri?

Nga burimet tona, miqësore shoqërore domethënë.

Pra janë informacione të marra kështu me shokë e të njohur nëpër kafene apo jo?

Po burime tonat pra, edhe në kafene duke pyetur kolegë, shokë.

Ju thatë që qeveria duhet t’ju jepte informacione, qeveria tha që informacione të karakterit teknik nuk lejohej të jepeshin. Gjithsesi, ju i keni kërkuar këto informacione pranë autoriteteve shtetërore? Apo vendosët të protestoni pa i pasur ato?

Ne thjesht i kemi biseduar këto punë në biseda të lira, kemi kërkuar informacione nga ekspertët.

Nga cilët ekspertë?

Tani unë nuk i mbaj mend këto detaje po flas që kemi biseduar…edhe me ekspertë që kanë ardhur dhe në protesta e kanë folur.

Çfarë ju kanë thënë këta ekspertë kimie juve?

Na kanë thënë që kushtet teknike për të bërë demontimin e armëve kimike sidomos gazit Zarin duan një rreze të pabanuar prej të paktën 30 kilometër nga vendi ku bëhet demontimi.

Këta ekspertë kimie janë shqiptarë?

Po po, këta normal që janë shqiptarë.

Ju jeni informuar mbi bazën teknologjike me të cilën do operonte OKB-ja? Si u bindët ju që rrezja do ishte 30 kilometër sic keni deklaruar ne media?

Ne dëgjuam që do vinin laboratorë po nuk dëgjuam që do vinin teknologji me këto që thoni ju.

Po atëherë nga ju doli distanca e rrezes prej 30 kilometër? Pse e besuat pikërisht këtë të dhënë për 30  kilometër rreze sigurie? Përse nuk besuat një shifër tjetër prej 40 kilometër apo prej 2 kilometër?

Po sepse aq është rrezja. Sepse neve e pamë dhe në SHBA, se aty është një bazë në Kentaki, dhe diametri i sigurisë në këtë bazë është 130 milje. E njëjta gjë dhe me bazat ushtarake në Rusi. Tani kur këto vende, veprojnë në këto kushte, si mund të veprohet në një zonë në Shqipëri, fjala vjen në Mjekës apo në Qafë Mollë.

Pra, ju kishit informacion për qendrën amerikane të Kentakit apo bazën ruse që po referoni…

Po… ne i kemi parë në televizion

Sepse kam parasysh që ato janë baza strategjike ushtarake dhe informacioni për to është i kontrolluar. Ju si e mësuat?

Epo gjatë kësaj kohe gjatë kësaj jave tepër të acaruar besoj se dhe fëmijët e kanë mësuar teknologjinë , e jo mos ta mësonim neve. Për ne shqetësimi kryesor ishte se jemi shumë vend i vogël. Kur neve kemi reaguar për herë të parë për këtë proces, mbas 10 ditësh apo diçka më tepër, ndoshta 2 javë, Kryetari i Parlamentit, ka deklaruar të njëjtat fjalë që kam thënë unë. Që Shqipëria është vend i vogël dhe ne nuk kemi mundësi për ti bërë këto gjëra.

Më duhet t’ju korigjoj. Kryetari i Parlamentit ka deklaruar se “Shqipëria do mbajë aq sa i mbajnë krahët” jo që nuk ka mundësi fare…

Këtë e ka thënë disa ditë më vonë. Mbas 4 ditësh në mos gaboj. Zoti Ilir Meta ka thënë pikë për pikë ato që kisha thënë dhe unë.

Zoti Frashëri, u vu re një protagonizëm i juaji, i  zotit Sazan Guri dhe organizatorë të tjerë në disa media sidomos emisione televizive. Si pranuat ju të shkonit të flisni për publikun, kur ju sot pranoni se nuk ishit të informuar? Sepse në “google” mund të kërkojë kushdo, edhe një adoleshent 14 vjeç, apo jo?

Shikoni këto janë mjete të komunikimit masiv, që nuk i hedh dot njeri poshtë, edhe në “Wikipedia” mund të kërkosh dhe ajo vetë të lajmëron për informacionin e pakonfirmuar. Por për hir të së vërtetës, nëse ne do të ishim kontaktuar nga qeveria shqiptare, apo ndonjë institucion tjetër dhe do të ishim informuar në lidhje me këtë proces edhe ne do ta jepnim atë mirëkuptimin tone. Dhe ndoshta dhe publikun do ta ndërgjegjësonim.

Pra ju keni dalë në TV dhe në shesh pa ditur realisht dhe konkretisht se çfarë po ndodhte?

Shiko… ne ishim të ndërgjegjshëm të mirinformuar, sepse kjo u bë dhe nga mediat botërore prestigjioze si “Foreign Affairs”

Më falni, ju keni protestuar sepse kishit një frikë shumë të madhe se këto lëndë do sillnin helmim. Është kështu?

Po kështu është.

Atëherë më thuaj cila medie ndërkombëtare ka thënë që “X teknologji” që do përdoret mbi këto lëndë do shkaktojë helmim apo vrasje masive?

Po ç’rëndësi ka kjo.. Kur organe prestigjioze të medias botërore ty të njoftojnë për procesin e demontimit të armëve kimike në masë nga Siria dhe vende me standarde të larta si Belgjika, Norvegjia, Rusia etj nuk e pranonin, atëherë i binte që kjo mund të mbetej tek neve…

Po ju e dini se një nga arsyet që Norvegjia, apo vende të tjera nuk i kanë pranuar këto lëndë mund të jetë fakti se këto shtete kanë marrëdhënie tregtare me Bashar Al-Asadin?  E dini që këto shtete mund të kenë dhe interesa  dhe arsye të tjera të cilat nuk kanë detyrimin t’i thonë hapur? Ju si ambientalistë shqiptarë e mbështesni zotin Asad?

Zotëri kjo as që mund të diskutohet fare. Si mund të mbështesim neve një diktator…

Pra ju nuk keni probleme politike me zotin Bashar Al-Asad, por vetëm problemin teknik të lëndës kimike apo jo?

Sigurisht që vetëm teknike të lëndës.

Pikërisht për këtë më duhet t’ju pyes përsëri. Ku e konstatoni problemin teknik, mund të më japësh një referencë zoti Frashëri?

Si ta them, ne kemi shqetësim qytetar, sepse si ta them, asnjëherë nuk ka një garanci absolute, që ky proces do shkonte kaq mirë dhe vaj.

Po kur hipën në avion ke garanci absolute?

Jo absolutisht që s’mund të ketë garanci absolute.

Po atëherë mbi ë ç’bazë i kërkuat këto garanci absolute vetëm në këtë rast zoti Frashëri?

Sepse ne kemi demontuar vetëm 16 tonë lëndë kimike, mendoje vetë tani çfarë mund të bëjnë 1300 tonë. Përveç kësaj ka dhe një problem se çfarë do bëhej me ambalazhin e këtyre armëve.

Ku e mësuat ju që ishin të ambalazhuara?

Po armët si rregull vijnë të ambalazhuara.

Si janë të ambalazhuara këto lëndë kimike tani që po flasim? Si janë të depozituara pra në depot e Asadit?

Po ku ta gjej unë këtë informacion se si janë vendosur apo organizuar ato lëndë kimike. Ne, me çfarë kemi lexuar në “google”, në revistën prestigjoze “Foreign Affairs” dimë që ato lëndë janë të depozituara në portin e Latakës në Siri.

Z.Frashëri, a mund të themi se ju keni dalë të protestoni të painformuar?

Ne kemi dalë si qytetarë për të mbrojtur interesin publik nga rreziku, të nisur nga shqetësimi qytetar.

Po si mund të dalë dikush në shesh për të mbrojtur opinionin publik nga rreziku, ndërkohë që nuk ka asnjë ide se çfarë është konkretisht ajo gjëja që e quan rrezik?

Se çfarë janë armët dhe çfarë rreziku kanë ne e dimë. Do ishte budallallëk të thoshim se nuk e dinim se kemi lexuar siç ju thashë dhe në internet në “google” dhe burime të tjera.  Ne nuk u treguam të papërgjegjshëm gjatë protestave sepse nuk krijuam asnjë anomali asnjë destabilitet në protesta.

Kush e dha idenë për të protestuar para Ambasadës Amerikane?

Shikojini në fotografi ose TV, vetë… Në krye të tyre janë njerëz dhe shoqata që janë financuar këto vite nga Ambasada Amerikane dhe ndoshta dhe nga Soros. Ne nuk ishim kundër Ambasadës Amerikane, madje unë personalisht nuk kam qenë duke protestuar aty.

Në Shqipëri është raportuar se ka prej vitesh të paktën 30 vatra me lëndë helmuese. Si ju duken 30 vatra, shumë? Apo normal?

Sigurisht që janë shumë, mund të ketë edhe më shumë, këto mbeten gjithnjë një burim rreziku.

Ju do kërkoni që lëndët në këto vatra ekzistuese të asgjësohen?

Po sigurisht që do e kërkojmë, kjo nuk ka dyshim.

Nuk keni frikë se gjatë asgjësimit të këtyre lëndëve mund të ndodhë ndonjë problem siç kishit merak  në rastin e lëndëve kimike siriane?

Po shiko….për sa kohë janë në mëshirë të fatit të pakontrolluara përbëjnë rrezik, por ekziston dhe rreziku gjatë asgjësimit.

Po atëherë si kërkoni ju që të asgjësohen këto lëndë që ndodhen këtu, ndërkohë që gjatë procesit të asgjësimit mund të na ndodhë gjëma?

Shiko…mendoj se për këtë proces duhet të mendojnë specialistët. Nëse e kryejnë specialistët do e mbështesim.

Për për këto lëndë duhet të mendojnë specialistët thoni ju, jo ambientalistët?

Po sigurisht që specialistët. Ata duhet të mendojnë.

*   *   *

Disa dokumente nga koha e rrumpallës SBL

Nga Xhevdet Shehu - Dita

Gjatë dy muajve të fundit ajo që  bën më shumë përshtypje janë sulmet që ish-Presidenti dhe ish-Kryeministri Sali Berisha bën duke e quajtur qeverinë e votuar në 23 qershor pa nisur ende punë si kleptokrate, hajdute, etj pa folur për etiketime të tjera, të cilat ai i sajon përditë sipas mënyrës së tij dhe për të cilat është i pakrahasueshëm. Pavarësisht se sa e besojnë, për të ka pak rëndësi.  Të thuash se shpif dhe sajon pambarimisht akuza të paqena, nuk ke as kohë. Lumi i sulmeve të tij bazuar sidomos në parimin “akuzo armikun për krimin që sapo ke bërë vetë” është i papërballueshëm në ditët e mbetura bosh pas rrëzimit nga pushteti. Ndoshta bëjnë mirë të gjithë ata që e shpërfillin. Por edhe ballafaqimi me dokumentet, për të parë mënyrën se si ai vetë ka qeverisur, është një përgjigje, që mund ta bëjmë ne të mediave, por që sigurisht nuk mjafton. Abuzimet e djeshme dhe të sotme, duhet të ndëshkohen e jo thjesht të tregohen. Ndërkohë ne bëjmë pjesën tonë të detyrës.

Tri dokumente të Kabinetit të Presidentit të janarit të vitit 1994, kohë në të cilën Berisha ka qenë president i vendit tregojnë mbi një udhëtim që presidenti i asaj kohe ka bërë në Malajzi dhe Brunei, vizitë shumë e komentuar dhe e dyshimtë qysh në atë kohë. Pas çdo paragrafi në këto dokumente mund të shtrohet një pyetje e thjeshtë: Përse? Përse duhej bërë ajo vizitë? Përse duhej të shkonte Presidenti i Shqipërisë në ato vende të largëta dhe çfarë u bisedua dhe çfarë marrëveshjesh u arritën? A kishte qëllime fetare ajo vizitë? Dhe së fundmi, çfarë përfitimesh solli për të mirën e vendit dhe të popullit shqiptar ajo vizitë? Këto pyetje lindin vetvetiu pasi të dyja këto vende, pra si Malajzia dhe Brunei janë vende myslimane. Koha kur është realizuar kjo vizitë është bërë pak kohë pasi Shqipëria ishte bërë anëtare e Konferencës Islamike.

Të bën përshtypje fakti se si jepeshin urdhrat. Kabineti i Presidentit anashkalon Qeverinë dhe urdhëron direkt ministrin e Financave për të kryer veprime financiare. “Ti jepen cash ne dore, 5 mije dollare” – urdheron njera nga shkresat

Brunei është një vend i vogël në një ishull të largët të Azisë juglindore. Është një monarki absolute, ku monarku thirret sulltan dhe është një nga njerëzit më të pasur të botës. Aktualisht, pra në vitin 2013 Brunei ka 400 mijë banorë, ndërsa para 20 vitesh ka pasur më pak se kaq, pra më pak se gjysmën e popullsisë së Tiranës. U tregua në atë kohë në qarqe të ngushta, kurse tashmë nuk përbën më sekret për askënd. Në vijim po e tregojmë ngjarjen ashtu si ka ndodhur. Pasi kishte përfunduar vizitën në Malajzi, delegacioni presidencial shqiptar i hipën avionit të posaçëm për në Brunei. Gjatë udhëtimit, një nga anëtarët e delegacionit i komunikon Presidentit Berisha se ne nuk kemi marrëdhënie diplomatike me Brunein dhe kjo krijonte probleme me protokollin.  Marrëdhëniet diplomatike me Brunein u lidhën… në fluturim.

Dokumenti i parë

REPUBLIKA E SHQIPËRISË

Kabineti i Presidentit

Tiranë më 17/1/94

Nr. 5479 Prot

Kompanisë Albanian Airlines

TIRANË

Në vazhdim të shkresës nr. 5479 datë 23.12.1993, delegacioni presidencial që do të vizitojë Malajzinë dhe Brunein, siç jeni në dijeni, do të niset nga Tirana me avion Charter të kompanisë suaj më 23 janar 1994 ora 8.30 dhe mbërrin në Zyrih ora 11.40 dhe po këtë ditë nga Zyrich me avionin e linjës MH 019 ora 13.00 dhe mbërrin në Kuala Lumpur ora 9.30 e datës 24 janar. Më datë 27 janar delegacioni largohet për në Brunei në ora 12.30 me avionin RMAF F28 të palës maleziane (të vënë në dispozicion për delegacionin). Më datë 29 janar 1994 delegacioni largohet nga Brunei me avionin MH 731, ora 18.35 dhe mbërrin në Kuala Lumpur ora 20.55 dhe në ora 22.15 me avionin MH 018 niset nga Kuala Lumpur dhe mbërrin në Zyrich ora 6.15 të datës 30 janar 1994 dhe po më datë 30 janar ora 8.00 niset me avion Charter të kompanisë Tuaj Albanian Airlines e mbërrin në Tiranë ora 11.10.

Delegacioni përbëhet nga:

Z. Sali Berisha, Presidenti i Republikës

Znj. Liri Berisha, bashkëshortja

Z. Selim Belortaja, Ministër i Industrisë dhe Tregtisë

Z. Arjan Starova, Zv.ministër i Punëve të Jashtme

Z. Arjan Adhami, oficer shoqërues

Z. Fatos Beja, Këshilltar diplomatik

Znj. Elisabeta Gjoni, Këshilltare për çështjet financiare

Z. Vahid Boriçi, Shefi i Protokollit

Znj. Aida Shehu, Zyra e Shtypit

Z. Pali Kuke, operator i TV.

Shënojmë se 5 vetat e parë do të jenë në klasin e parë dhe 5 të tjerët në klasin e dytë.

Z. Vahid Boriçi do të udhëtojë më 18 janar me avionin e Kompanisë Tuaj 7Y 301 ora 7.50 nga Tirana në Zyrich dhe me avionin BI 082 po atë ditë për në Kuala Lumpur.

Shpenzimet përballohen nga ana Jonë, për dy fluturimet Çarter dhe biletat e udhëtimeve të linjave të mësipërme.

Shefi i Kabinetit

Edmond Seferi

(Firma)

Llogarisë këtu:

Për veprim sa më sipër.

Dokumenti i dytë

REPUBLIKA E SHQIPËRISË

Kabineti i Presidentit

Tiranë më 20.1.94

Nr.01 Prot

ZOTIT PIRO DISHNICA

MINISTËR I FINANCAVE DHE EKONOMISË

TIRANË

Për udhëtimin e Presidentit të Republikës, Tiranë-Malajzi dhe kthim nevojiten 83.000 USD (tetëdhjetë e tre mijë dollar amerikan). Në kundërvleftë të kësaj shume të rritet plani i buxhetit për dy mujorin 8.3 milionë lekë.

SEKRETARI I PËRGJITHSHËM

Kolec Topalli

(Firma)

Dokumenti i tretë

REPUBLIKA E SHQIPËRISË

Kabineti i Presidentit

Tiranë 17.1.1994

Nr.5479/2 Prot

LLOGARISË

Këtu

Sipas pososisë së dhënë, për delegacionin presidencial që viziton Malajzinë dhe Brunein, të merren këto masa:

1. Z. Vahid Boriçi të marrë 10 mijë dollarë cash si dhe një çek prej 10-15 mijë dollarë, si fond rezervë për shpenzime sipas rregullave financiare.

2. z. Fatos Beja të marrë 5 mijë dollarë cash.

3. Sipas kërkesës së palës malejziane të përgatiten fotografitë e Presidentit Prof. Dr. Sali Berisha në formatet e duhura 9të vogla e të mëdha), si dhe kartëvizitat.

4. Të përgatiten rreth 22 dhurata për personalitetet e larta në Malajzi e Brunei, të cilat do të jepen, sipas miratimit të Presidentit dhe fondit që ka për këto raste.

5. Sipas kërkesës së palëve pritëse të përgatiten flamurët shqiptarë në format për t’i vendosur në veturë, në pallatin presidencial, në tavolinë të bisedimeve dhe për nënshkrim të marrëveshjeve.

6. Siapas kërkesës së palëve pritëse të përgatiten në RTV 2 kaseta më këngë popullore shqiptare dhe 2 videokaseta me pamje nga vendi ynë.

7. Të përgatiten dietat përkatëse për anëtarët e delegacionit.

8. Të përgatitet, sipas kërkesës së palëve pritëse, një kasetë me himnin kombëtar.

SHEFI I KABINETIT

Edmond Seferi

(Firma)

*   *   *

PSE Gjika

i dha leje ndërtimi në det 

Lulzim Bashës?!

Kompleksi “Jon” ka dhjetëra shkelje që konstatohen në aktin e ekspertimit të përpiluar nga ekspertja Luiza Bala, e cila është ngarkuar nga prokuroria e Vlorës, me qëllim hedhjen dritë mbi këtë çështje. Akti sqaron shkeljet zinxhir të zyrtarëve të bashkisë së Vlorës, përfshirë këtu dhe kryebashkiakun Shpëtim Gjika, që ka miratuar lejën e ndërtimit në kundërshtim të çdo rregulloreje ndërtimore. Planimetria e pallatit është pranuar nga Gjika, duke përfshirë dhe sipërfaqen detit. Në vendin ku është ngritur pallati në pronësi të vjehrrit të Lulzim Bashës, Xhafer Isufi, është lënë zonë e lirë nga ndërtimet dhe e pa përfshirë me ndërtime.

Sipas ekspertes ka shkelje në dhënien e sheshit të ndërtimit, plani i përgjithshëm rregullues i vitit 1996 e përcakton zonën e ndërtimit të ri, në emër të Xhuvi Sharxhit e Xhafer Isufit, si zonë plazhi pa ndërtime. Ndërkohë që shkelje të tjera janë dhe miratimi i lejës së ndërtimit për 6 kate. Sipas ekspertes Luiza Bala, janë një sërë shkeljes të një pas njëshme që i kanë hapur rrugë ndërtimit të kompleksit “Jon”.  Gazeta “Shqiptarja.com”, disponon të plotë aktin e ekspertimit ku Luiza Bala i ka dhënë përgjigje 5 pyetjeve të bëra nga prokurori Maksim Sota. Ndërkohë që pas ndërtimit të objektit, pronarët e truallit e kanë hipotekuar atë së bashku me rreth 4 mijë metra katror, në një kohë kur vetëm 1663 metra kanë blerë. Sipas prokurorisë së Vlorës, në rastin konkret dy pronarët kanë hipotekuar dhe sipërfaqen e ujit.

Prokurori:  Mbështetur mbi lejën e miratimit të kondicioneve urbane dhe lejës së ndërtimit dhe të gjithë dokumentacionit tekniko-ligjor për kompleksin “Jon”, a konstatohen shkelje të ligjit “Për Urbanistikën” dhe rregulloren përkatëse të dalë në zbatim të tij?

Ekspertja:  Mbështetur mbi Planin e Përgjithshëm të Qëndrës së Qytetit duhet të hartohet të hartohet një studim pjesor për zonën ku bën pjesë ndërtimi i ri. Nuk konstatojmë që në fashikullin hetimor të ketë studim urbanistik pjesor, ku të jetë parashikuar dhe ndërtimi i objektit të mësipërm. Mbështetur në zinimin e bërë, rezulton se ndërtimi i ri miratuar nga KRRT-ja e Bashkisë së Vlorës, kjo e investitorëve dhe në pronën e Xhuvi Sharxhit dhe Xhafer Isufit, është zonë e lirë nga ndërtimet, e pa përfshirë në ndërtime.

Prokurori:  Nëse ka shkelje, mund ti përcaktoni këto shkelje?

Ekspertja: Konstatojmë se janë këto shkelje: Ka shkelje të PPRR dhe PPQQ në dhënien e sheshit të ndërtimit. Plani i Përgjithshëm Rregullues i vitit 1996 e përcakton zonën e ndërtimit të ri në emër të Xhuvi Sharxhit e Xhafer Isufit, si zonë plazhi pa ndërtime.Plani i përgjithshëm i qëndrës së qytetit, e ka përcaktuar si zonë të lirë nga ndërtimet. Studimi pjesor i qëndrës së qytetit, zonimi funksional, Tynel-Ujë të Ftohtë,e ka përcaktuar si zonë pa ndërtime. Sheshi i ndërtimit ka një ndërtesë deri në gjashtë kate, të miratuar në këtë vend. Duke cituar vetëm këto dokumente, duket qartë mospërputhjet e tyre duke shkelur kështu, çdo studim tjetër pjesor. Kushtet e vendosura në këtë studim të miratuar në KRRTSH ose ndryshe duhet të kishte kaluar si studim i veçantë në KRRTSH, i qëndrës. Studimi urbanistik i zonimit të zonës Tynel-Uji i Ftohtë, i KRRT Bashkia Vlorë, është miratuar në KRRTSH, por nuk kemi Studim Urbanistik Pjesor që të jetë i mbështetur në këtë të fundit, ku të jetë pasqyruar dhe ndërtimi i ri. Konstatojmë se kushtet e përcaktuara nuk janë plotësuar nga KRRT-ja e Bashkisë Vlorë dhe nga DPU e Bashkisë Vlorë, për dhënien e sheshit të ndërtimit për objektin. Kjo do të thotë që në sheshin e ndërtimit dhe lejën e miratuar nga bashkia, nuk janë zbatuar kushtet e përcaktuara në ligjin “Për Urbanistikën”.

Prokurori: Mbështetur në dokumentat e pronësisë që ndodhen në dosjen hetimore, leja dhe sheshi i ndërtimit, a është dhënë konform kufinjve të pronësisë?

Ekspertja: Mbështetur në dokumentat që janë në dosje, harta treguese e pronësisë së Xhuvi Sharxhi e Xhafer Isufi, për objekin godinë banimi dhe shërbimi në lagjen Uji i Ftohtë, ndërtimi është brenda kufinjve të pronësisë së pasurisë. Shënin (Përgjigjia është dhënë në për periudhën që sa kishte nisur ndërtimi i kompleksit “Jon” në 2011)

Prokurori: Nga verifikimi i gjëndjes në teren të përcaktohet nëse është respektuar leja dhe planimetria e sheshit të ndërtimit të dhënë?

Ekspertja:  Në momentin e inspektimit në teren kantjeri i ndërtimit ishte i rrethuar dhe në fazën e punimeve të dherave. Nuk kishte filluar piketimin e objektit dhe nuk mund të flas për këtë qëllim.

Prokurori: Nga verifikimi i gjëndjes në teren, kufinjtë ku shtrihen punimet e sistemimit të dherave, ai i kalojnë kufinjtë e pronësisë sipas dokumentave të zyrës së regjistrimit të pasurisë së paluajtshme Vlorë?

Ekspertja: Materialet e ndërtimit në këtë rast dherat e gërmuar për hapjen e sheshit të ndërtimit, janë shtrirë dhe jashtë kufinjve të pronësisë. Gurët dhe inertet janë në formë grumbullimi dhe kanë një ngritje në lartësinë e vijës së bregut të detit, duke krijuar një varg të rregullt, tip prite që mendoj se është si masë paraprake për ruajtjen e punimeve nga dallgët e detit. Pra materiali inert i nxjerë nga gërmimet e themeleve kalon kufirin e pronësisë ekzistuese.

*   *   *

Një fitore? Apo një rast i artë i humbur?

Nga Adrian Thano

A mund të bëhej në Shqipëri një proces demontimi armësh kimike nën mbikqyrjen amerikane? Ndoshta po, ndoshta jo, këtë nuk do ta mësojmë dot më. Kreu i qeverisë shqiptare nën presionin e protestuesve tha JO. Një fitore? Apo një rast i artë i humbur? Sot jemi ende të emocionuar; nuk jemi gati për përgjigjen. Por do na duhet t’ia ribëjmë vetes këtë pyetje shumë shpejt. Nuk di pse kam bindjen që shumë shqiptarë të cilët sot gjykojnë se u arrit një fitore, do ta mendojnë ndryshe këtë punë kur zemrat t’u ftohen.

Shqipërisë iu kërkua të ndihmonte në një problem urgjent dhe me rëndësi të madhe. Dhe nuk iu kërkua falas. Shqipëria kishte njëherazi detyrimin të ndihmonte ata që Shqipërinë e kanë ndihmuar shpesh. Shqipëria tha JO.  Kishte rrezik? Sigurisht. Por disa gjëra duan guxim. Ky guxim na mungoi. Këtë herë ia mbathëm. Nga miqtë, nga detyrimet, nga puna. Ndihemi krenarë që shpëtuam veten. Po mund të ndiheshim ca më shumë krenarë nëse do ta provonim dhe do dilte me sukses. U treguam protestues të mëdhenj? Apo njerëz të vegjël?

Ajo që ndodhi po përshëndetet si fitore e demokracisë. Sot, po. Po nesër? Kjo protestë mund të ishte vërtet spontane dhe e sinqertë. Na mësoi që nuk ia paskemi më frikën sheshit përballë kryeministrisë. Dhe shumë mirë që më në fund ngjau. Po marifetçinjve të protestave çfarë u mësoi? Jam i sigurt që ata do rikthehen aty në shesh me kauza të tjera të sajuara. A do tërhiqet vazhdimisht kryeministri? Sa herë do tërhiqet? Kush do lodhet më shpejt?

Meqë jemi te kryeministri: Edi Rama fitoi apo u dorëzua? Ja një pyetje tjetër, përgjigjja e së cilës do kërkojë pak kohë. Sot mund të rikonfirmojmë që Edi bën fjalime të bukura. Ka mundësi që pas shumë vitesh t’i recitohen siç recitohet sot, Noli. Një javë pas 21 janarit përshembull i bëri njerëzit të qanin në shesh. Qau dhe vetë, me sa mbaj mend. Por ja që për 21 janarin nuk është bërë ende drejtësi. Lotët u thanë, fjalët i ka marrë flladi, veprat ende i presim.

Dhe meqë mbërritëm te veprat në pritje, vijmë te Berisha; 

Mizerja që nuk na shqitet nga këpucët,

një lapidar i shtrembëruar i zgjyrës sonë morale. 

“Filoamerikani” i tërbuar, i shndërruar në antiamerikanin më tinzar në 2013, për të njëjtën arsye që u shndërrua nga komunist fanatik, në antikomunistin “demokrat” 23 vite më parë. 

Një i pandehur për vrasje dhe hajdutëri, që endet shesheve. 

Për të na kujtuar, (bashkë me të sipër-renditurat dhe të tjera arsye pa fund), 

sa e paplotë është fitorja jonë e supozuar.

*   *   *

Ilir Meta pro shembjes së “Pallatit të Bashës”:

Të zbatohet ligji si për çdo qytetar!

I pyetur nëse duhet të prishet pallati i vjehrrit të Lulzim Bashës në Vlorë nga Inspektoriati Ndërtimor Urbanistik Kombëtar, kryetari i Kuvendit, Ilir Meta, deklaron se ligji duhet të zbatohet për të gjithë njëlloj. Sa i takon çështjes së armëve kimike, kryeparlamentari thekson se ka qenë i informuar nga qeveria.

Mendoni se u krijua një precedent se qeveria duhet të zbatojë atë që thotë populli?

Ilir Meta - Është parim qytetar. Nuk mendoj se është ky rasti në fjalë, sepse shqetësimi i qytetarëve ka pasur një bazë reale, pasi nevojitej informacion në rast se do zhvillohej një veprim i tillë, çfarë situatash do krijonte ai, a ishin mundësitë në vendin tonë. Frika për një sasi të tillë lëndësh kimike krijoi shqetësimin e qytetarëve. Plus që ne dhe në të kaluarën kemi pasur rast të tilla, siç është rasti i Gërdecit apo i rasteve të tjera në përmasa më të vogla. Nuk mund të themi se ka qenë një shqetësim pa baza. Në këto dy drejtime mendoj se qeveria nuk mund t’i injoronte këto shqetësime.

Mendoni se ne nuk i kemi kapacitetet? Pse nuk u tha jo që në fillim?

Ilir Meta -Gjithmonë ka qenë mendimi dhe ideja për të ndarë përgjegjësi në këto aksione të përbashkëta ndërkombëtare dhe për të shqyrtuar mundësinë e shkallës së këtij kontributi dhe mënyrës. Është gjëja më e lehtë të thuash jo dhe me sa duket kryeministri Rama në një linjë konsistente me politikën e Shqipërisë për të kontribuar për paqen dhe sigurinë, ka shqyrtuar të gjitha mundësitë dhe hapësirat se sa mund të kontribuonte Shqipëria.

Në ç’rrugë e morët vesh ju, që Shqipërisë iu propozua të merrte këto armë?

Ilir Meta -Nuk besoj se ky është një element i rëndësishëm. Kryeministri Rama në fjalën e tij bëri një parashtrim të gjithë arsyeve. Ne kemi pasur bisedime të herëpashershme, ku më është bërë e ditur se ka një interes për të përfshirë Shqipërinë në një aktivitet të tillë, në përputhje me mundësitë që ajo ka për të kontribuar.

A ka ndryshim vizioni mes jush dhe Ramës sa i takon mundësive?

Ilir Meta -Mendoj se fakti që janë bërë diskutime të vazhdueshme do të thotë se ka qenë rezultat i vlerësimit të kapaciteteve, që ne nuk i kemi. Besoj se këtu ka një përputhje të qartë të qëndrimit dhe vlerësimit tonë. Ka qenë një vendim i përbashkët.

E kishit marrë garancinë që do zhvendoseshin mbetjet?

Ilir Meta -Nuk kam qenë pjesë, por di se kryeministri Rama ka qenë i qartë dhe i bindur se ky proces nuk i përkiste Shqipërisë.

Ishit i njohur me këtë fakt para se të dilnin ambientalistët për të protestuar?

Ilir Meta -Kam qenë i informuar për këtë propozim prej disa kohësh. Zoti Rama ka bërë shpjegimet e tij publike, po ashtu edhe ambasadori i SHBA. Mendoj se qëllimet kanë qenë pozitive nga të dyja palët.

Ku gabuan, çfarë mund të kishin bërë ndryshe?

Ilir Meta -Nuk mendoj se ka të bëjë me menaxhimin e situatës dhe të opinionit publik. Shqetësimi nuk ishte i pabazë. Edhe sikur të ishin garancitë me të mëdha, prapë shqetësimi do të ishte i pranishëm.

Rama u shpreh se përfaqësuesit e OKB i kërkuan të ruante konfidencialitetin e këtij informacioni. A mendoni se duhet të ishte më transparent me opinionin publikun?

Ilir Meta -Nuk mendoj se është e njëjta situatë për të hequr një paralele me rastin e Rambujesë, pasi atëherë kishim një rast të vazhdueshëm ngjarjesh. Në rastin konkret ka qenë thjesht një propozim, një ide, që duhej shqyrtuar. Dhe përgjegjësinë e parë në këtë rast e ka qeveria dhe instancat. Nuk kemi rastin kur qeveria ka një bindje dhe më pas kjo duhet ndarë me parlamentin dhe publikun e gjerë.

Sa i takon humbjeve që përfliten?

Ilir Meta -Mendoj se janë më shumë se legjenda urbane. Në rast se Shqipëria do të bëhej pjesë e një operacioni të tillë, pa dyshim që vendi do të rriste peshën e saj, rolin e saj në planin ndërkombëtar. Ky do ishte një kontribut i Shqipërisë për paqen dhe sigurinë në botë.

Ka spekulim se SHBA përmes institucioneve të ndryshme do të mbulonin gropën e zezë të mbuluar në buxhetin shqiptar nga qeveria e mëparshme. A mos është kjo një aventurë financiare për të mbuluar një aventurë të qeverisë së mëparshme?

Ilir Meta -Bëhej fjalë për të marrë një përgjegjësi, që mund ta mbanim ose jo në varësi me vlerësimin kompleks të kësaj sfide, ndërsa çështja tjetër është e njohur për faktin që qeveria është në tratativa me FMN-në. Përtej propozimit për t’u përfshirë në këtë operacion.

A mund t’u themi ultrapragmatistëve që nuk kemi humbur asgjë?

Ilir Meta -Kemi fituar një standard të ri demokratike

Ju dolët nga zyra shkuat të protestuesit dhe i qetësuat. Çfarë nënkuptonit? Që vota juaj ishte kundër këtij projekti?

Ilir Meta -Jo, kjo nuk ka të bëjë me këtë. Ishte në vijim të deklarimeve që unë kisha bërë edhe më parë, për të deklaruar siguri, përkundër spekulimeve dhe përpjekjeve për të përhapur panik dhe për të agravuar situatën për arsye politike. Opozita u vendos në krye dhe element të tjerë u përshinë në këtë çështje sensitive. Kam qenë në komunikim të vazhdueshëm edhe për përfaqësues të protestuesve, për të qetësuar situatën. Unë e ndjeva për detyrë që të bëja një komunikim të thjeshtë me ta për t’i qetësuar dhe për t’i bërë të qartë se nuk do të ndodhte asgjë fshehur syve të tyre.

Nëse do ju vinte projekti të enjten, ju si do votonit?

Ilir Meta -Projekti nuk do ishte i thjeshtë, do vinte me një relacion. Nëse qeveria do ecte me këtë rrugë do ishte e bindur për një siguri të këtij procesi. Theksova edhe më parë që nuk ka pasur asnjë vendim nga ana ime si do votoja, pasi nuk kam parë asnjë vendim, asnjë projektligj mbi këtë çështje. Nuk kam pasur paragjykime, pavarësisht se i kam mirëkuptuar të gjithë shqetësimet e qytetarëve dhe ambientalistëve. Gjatë takimit me ambasadorin dhe kryeministrin në një kafe të zakonshme pas një aktiviteti, është folur shumë pak për çështjen e armëve kimike.

Kemi dy ministra të LSI që deklaruan votën kundër armëve kimike dhe deputete të PS. A mendoni se Rama u tërhoq për shkak të numrave që po humbiste në parlament?

Ilir Meta -Nuk besoj se kjo ka qenë arsyeja. Nuk ka pasur deputete të LSI-së kundër, mbase kështu janë interpretuar apo paraqitur mendimet e tyre. Qeveria nuk ka qenë plotësisht e bindur në përpilimin e një akti me siguri absolute, i cili jepte një përgjigje të plotë, të qartë, gjithë atyre shqetësimeve që u ngritën.

Në këto rrethana ju do votonit kundër?

Ilir Meta -Nuk mund të votonim, pasi nuk kishte një akt.

 A u konsultua mjaftueshëm kryeministri me ju?

Ilir Meta -Mendoj se po.

Me opozitën. Të gjithë janë kuriozë se çfarë biseduat me zotin Berisha në Kuvend?

Ilir Meta -Nuk ishte ndonjë diskutim shumë i gjatë. Ishte një përpjekje imja për të vendosur në funksionalitet Kuvendin pasi PD në kundërshtim me rregulloren kërkonte ndërprerjen e punimeve në parlament dhe ndërprerjen e vizitës zyrtare të kryeministrit Rama dhe që ai të paraqitej në Kuvend. Dhe kjo ishte në kundërshtim me rregulloren. E pata të vështirë ta bindja.

Arvizu tha e pata të vështirë të kuptoj kush e drejton PD, ju e keni kuptuar?

Ilir Meta -Përderisa u ula afër zotit Berisha, besoj se e kam kuptuar.

Dje pamë në shëtitoren e Vlorës, kryeministri Rama që po ndiqte operacion e shkatërrimit të ndërtimeve të paligjshme. A mendoni se ky është objektivi kryesor i kësaj qeverie? Pasi deri tani s’kemi parë aksion tjetër.

Ilir Meta -Objektivi kryesor i qeverisë është sundimi i ligjit dhe vendosja e kontrollit mbi territorin, pasi të gjithë jemi të ndërgjegjshëm për shkatërrimin e shumë resurseve dhe jo vetëm ambientit. Ndaj dhe ky aksion sa i takon ndërtimeve pa leje sidomos në zonat turistike, kuptohet që është një shprehje e këtij vullneti për të vendosur sundimin e ligjit në vend. Opozita kuptohet që do kundërshtojë çdo aksion të qeverisë.

Duhet të shembet pallati i vjehrrit të kreut të opozitës në Vlorë?

Ilir Meta -Për mua duhet të respektohet ligji njësoj për çdo qytetar të vendit, pavarësisht lidhjeve që mund të ketë njëri apo tjetri. Kjo nuk është një çështje që mund ta vlerësoj unë. Nuk kam kompetencën për ta bërë këtë gjë, apo marrjen e atributeve që i takojnë institucioneve të tjera.

Mund të ndërmerren edhe reforma që mund të kenë kosto elektorale. A mendoni se po harxhohet energji me gjëra periferike? Si për shembull operacioni “Fundi marrëzisë” që mbylli lojërat e fatit dhe më pas u rihapën të gjitha. Apo kaluan nga njëra dorë në tjetrën?

Ilir Meta -Ky është një spekulim që vjen nga opozita. Ai ishte një aksion kundër evazionit, abuzimit. Qeveria po tregon vullnet për të vijuar me zbatimin e ligjit. Do ketë reforma shumë të rëndësishme. Dhe qeveria është në proces konsultimi me aktorë dhe institucione të rëndësishme.

Një nga reformat është ajo në drejtësi. Është shfaqur në publik një qëndrim i kundër mes PS dhe LSI…

Ilir Meta -Sa i takon reformave institucionale do ketë një axhendë të bërë publike. Por këto reforma do konsultohen edhe me partnerët tanë ndërkombëtarë, e kryesisht reformat për forcimin e shtetit të së drejtës dhe në luftën kundër korrupsionit dhe krimit të organizuar.

 Ju jeni pakicë brenda shumicës, por një pakicë që ka peshë.

Ilir Meta -Ne jemi një mazhorancë që funksionon në mënyrë bashkëpunuese. Nëse ka diferencë në mendime, s’do të thotë se ka diferencë në qëndrime.

Çfarë kushtesh keni për të njësuar qëndrimet me PS?

Ilir Meta -Ne kemi një program të përbashkët, në emër të këtij koalicioni të përbashkët, dhe qëllimi ynë kryesor janë reformat që afrojnë Shqipërinë me BE.

Sa i përket akuzave të opozitës për “Crown agents”, ju çfarë qëndrimi keni?

Ilir Meta -Para se të bëhej kryeministër, Rama ishte shprehur për të ndërmarrë një iniciativë të tillë. Është pozitive kjo nismë nisur nga gjendja e të ardhurave në vend. U bënë spekulime nga opozita, por kemi edhe një qëndrim publik të ambasadës britanike në Tiranë. Them se është marrëveshje me interes kombëtar. Nuk besoj se ka probleme me Brukselin. Shqipëria vazhdon të bashkëpunojë me institucionet ndërkombëtare, ndërsa “Crown agents” është një vlerë e shtuar për të arritur rezultate të mira në realizimin e të ardhurave tona doganore.

Opozita thotë se kjo është një mënyrë për të paguar lobizmin e Tony Blair?

Ilir Meta -Kjo nuk qëndron, mendoj se kjo është një marrëveshje pozitive.

Sa i takon presidentit, a është mbi palët?

Ilir Meta -Për mua është e rëndësishme të theksoj bashkëpunimin midis institucioneve. Në këtë drejtim mendoj se zgjedhja e kryetarit të Gjykatës Kushtetuese ishte shprehje e vullnetit të mazhorancës së re për të bashkëpunuar më presidentin dhe për të konsoliduar ato institucione që kanë shprehur angazhimin. Sigurisht që nuk mund të jenë të gjithë të kënaqur me vendimet e kësaj gjykate. Ne kemi qenë të hapur të bashkëpunojmë edhe duke respektuar të drejtën e presidentit për të përmbushur të drejtën dhe detyrimet e tij kushtetuese. Them se po përpiqet t’i përmbushë sa më mirë.

Ekziston mundësia që të ketë ndryshim të drejtuesve të institucioneve kushtetuese para përfundimit të mandatit të tyre?

Ilir Meta -Nuk mund të them, pasi qëllimi i kësaj mazhorance nuk është të bëjë ndryshime individësh, por të sjellë një qasje të re në raport me institucionet e pavarura.

Opozita çoi fillimisht në KQZ e më pas në Kolegjin Zgjedhor kërkesën ku kërkoi anulimin e zgjedhjeve në Korçë, me pretendimin se vota aty është blerë. Ju si mendoni, a ka shitblerje vote në Shqipëri?

Ilir Meta -Për këtë pretendim që ka ngritur opozita unë i kam dhënë mbështetje Prokurorisë për të hetuar rastin. PD duhet të jetë e kënaqur për këtë zgjedhje, pasi përsëritja e zgjedhjeve në Korçë do të kishte një rezultat edhe më të thellë.

         Të zbatohet ligji si për çdo qytetar!

                                 (video)

http://imazheshqip.blogspot.com/2013/04/levizja-socialiste-per-integrim.html

*   *   *